དཔའ་བོ་གཅིག་ཏུ་གྲུབ་པའི་སྒྲུབ་ཐབས།
དཔའ་བོ་གཅིག་ཏུ་གྲུབ་པའི་སྒྲུབ་ཐབས།
རྒྱ་གར་སྐད་དུ། སིདྡྷཻ་ཨེ་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ཐབས། སྔར་བཤད་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། པདྨ་དཀར་པོའི་སྟེང་དུ་ཡི་གེ་ཨཱཿ་དཀར་པོ་ལས་བྱུང་བའི་ཟླ་བ་ལ་ཡི་གེ་དྷཱིཿ་དཀར་པོ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་དཔའ་བོ་གཅིག་ཏུ་གྲུབ་པ་ཞེས་བྱ་བ། སྐུ་མདོག་ཐམས་ཅད་དཀར་བ་ཞལ་གཅིག་ཕྱག་གཉིས་པ། གཡས་པས་མཆོག་སྦྱིན་པ། གཡོན་པས་ཨུཏྤལ་སྔོན་པོ་བསྣམས་པ། ལྷ་རྫས་ཀྱི་རྒྱན་དང་ལྡན་ཞིང་མཛེས་པ། རྣམ་པར་བཀྲ་པའི་ན་བཟའ་བསྣམས་ནས་སྐྱིལ་ཀྲུང་གིས་བཞུགས་པར་བདག་ཉིད་སྐད་ཅིག་གིས་རྫོགས་པར་བྱས་ལ། མགོ་བོ་དང་མགྲིན་པ་དང༌། སྙིང་ག་རྣམས་སུ་ཡི་གེ་ཨོཾ་ཨཱཿ་ཧཱུཾ་རྣམས་དགོད་པར་བྱའོ། །ཨཱཿའི་ཡི་གེ་དང་ཧཱུཾ་གི་གཉིས་ཀྱི་བར་དུ་ཡང་ཡི་གེ་དྷཱིཿའི་འོད་ཟེར་གྱིས་འཇིག་རྟེན་གྱི་དོན་བྱེད་པར་གྱུར་པས་གསང་སྔགས་བཟླས་པར་བྱ་སྟེ། ཨོཾ་རྡོ་རྗེ་རྣོན་པོས་སྡུག་བསྔལ་གཅོད། །ཤེས་རབ་ཡེ་ཤེས་དག་གི་སྐུ། །ཡེ་ཤེས་སྐུ་སྟེ་གསུང་དབང་ཕྱུག །ཨ་ར་པ་ཙ་ན་དབང་འདུད། །དཔའ་བོ་གཅིག་ཏུ་གྲུབ་པའི་སྒྲུབ་ཐབས་སོ། །མཁས་པ་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།
དཔའ་བོ་གཅིག་ཏུ་གྲུབ་པའི་སྒྲུབ་ཐབས།